Gemeinde Saterland

Johanniter-Kapelle Boukelisk un Informatsjoons-Punkt

 Fräislound waas in't Middeloaler een Hemat foar  fúul Oardens-Meenskuppe. In 1132 líeten sik foar't eerste Moal Benediktiner-Mönke ap fräiske Grúunde deel. Bolde foulgeden Augustinere, Zisterziensere,  Prämonstratensere un Dominikoanere. In't 13.  Jíerhunnert loken dan do Rieder-Oarden, also do Johannitere un do Tämplere, in Fräislound ien.

Do Klaastere wieren die Middelpunkt fon aal dät gäistelke Líeuwend. Do Mönke un Nunnen bededen foar dät Selenheel fon do Fräizen. Man uk foar dät politiske Líeuwend wieren do Klaastere nit tou fertichtjen. Do Mönke skreeuwen do fräiske Gjuchtshondskrifte ou un woarden bäte do Klaaster-Muren Skriftstukke un Ferdrage.

In dän Loop fon Reformatsjoon un Säkularisatsjoon wuden in Fräislound bienaist aal do Klaaster-Bauwíerke fernäild. Ju litje Johanniter-Kapelle in Boukelisk kude uurlíeuwje, uumdät ju tou do Lounderäien fon dän Biskop fon Münster heerde. Ju is ju lääste bauhistoriske Tjugenze fon ju aleer so foarmenrieke Klaaster-Loundskup ap fräiske Grúunde.

.

Die Johanniter-Oarden waas uremäite toalriek in't fräiske Rebät fertreden. 24 Deelläitengen roate dät in't Middeloaler in een Rebät, dät uur do binneeuropäiske Skede fon dälig sjúnelk ruutgungt. In ju Fergeenhaid fon dän Johanniter-Oarden bilgeden jo n baldoarigen Sunnerfaal: Touhope sätten sik aal do Fräiske Oardenshúze (bit tou een bistimde Mäite) fon do Oardens-Uppere ou un moakeden hiere oaine Seke. Uunbíeldede Laien-Brúure un Laien-Sustere wuden in grote Toale in do Oardenshúze apnúmen. So studen Dubbelklaastere ap, wier Mönke un Nunnen touhopelieuwden. Touhope bifúlen jo God hier Lieuwend oun, dät in't ruge fräiske Rebät foaraaln uut Lound-Oarbaid bistude. Neen Wunner also, dät aan oardentelke Riederbrúur – as hie tou n Johanniter-Oarden heerde – sieläärge nit ap Fräiske Grúunde koom.

In Boukelisk in ju Idylle fon't Seelterlound is een Klaaster-Kapelle tou sjoon, ju insen dät gäistige Säntrum fon een litje Oardens-Meenskup fon Johanniter-Nunnen un -Mönke waas. Archäologiske Uutgreeuwengen rund uum ju Kapelle häbe hiere Bau-Histoorje rekonstruíerbeer moaked: Metall-, Leder-, Stof-, Bunken- un Keramik-Funste läwerden Waiwiezengen uur ju Líeuwendswareld fon do eerdere Biwonere. Un hier Líeuwend waas wäil nit licht: So ferslíepeden in 1472 twäin Soande fon dän Biskop fon Münster aan Laienbrúur, uum Loze-Jäild tou aaskjen. „Wy syn alle arm un knechte aller armen“ skreeuw tachentig Jíere leter die Komtur (Klaasterboas) fon Boukelisk.

In 1587 sunt läiweloa aal do Johanniter-Brúure un -Sustere ferswúnen. Die lääste Komtur fon Boukelisk ferpachtede do Goude fon dät Klaaster oun twäin Holloundere un biëendede so ju bienaist tjohunnertjíerige Fergeenhaid fon dät Oardenshúus. Do boukelisker Goude bleeuwen daach noch bit in't 19. Jíerhunnert in ju Hounde fon dän Oarden.

 In 2011 wude in ju eerdere Pasteräi ieuwenske ju moor as 600 Jíere oolde Kapelle fon dät foarmoalige Johanniter-Klaaster een Bisäiker-Säntrum tou ju Histoorje fon dän Johanniter-Oarden in do noudelke Kusten-Rebätte iengjucht. Düt skuul juust so dät wietenskuppelk interessíerde Publikum as uk Touristen ju Múgelkhaid bjode, sik in ju bitjudende Klaaster-Histoorje in ju fräiske Ruumte ientouoarbaidjen un uur do Bisunnerhaiden wíes tou wäiden.

In ju Uutstalenge rakt dät uk masse Multimedia-Ounweendengen, do een iendrukkelke Bíelde fon dät eerdere Klaaster un dät Líeuwend junner fermiddelje.
Ju Meente Seelterlound un ju holloundske Stiftenge „Vrienden van de Nieuwe Schans“ stoalden touhope een skeed-uurgriepend Projekt ap do Beene, foar ju Skäppenge fon regionoale Informatsjoons-Säntren foar historisk un archäologisk bitjudende Steden un Rebätte. Die Projekttitel HAIP stoant foar „Historisk-Archäologisken Informatsjoons-Punkt“: So wude ap bee do Sieden aal een Bisäiker-Informatjsoons-Säntrum apgjucht.  

In Näiskans (Bad Nieuweschans) wude dät Informatsjoons-Säntrum in ju „Oude Remise“ („Oolde Remise“) dät uur ju Uursproangs-Histoorje rund uum dät düütsk-niederloundske Dullerd-Rebät informíert, ap dän 21.06.2010 epend. In ju Meente Seelterlound wude in Boukelisk ieuwenske ju historiske Klaaster-Kapelle aan histoorisken Informatsjoonspunkt iengjucht, die uur ju bitjudende fräiske Klaaster-Loundskup ruutgungend ju Histoorje fon dän Johanniter-Oarden in't middeloalerske Fräislound tou n Thema moaket.