Partnerschaft mit der Stadt Środa Śląska (Polen)
Uut ju sänt 1997 plegede Skoul-Partnerskup twiske dät Skoulsäntrum Seelterlound un Skoulen fon ju Stääd Środa Śląska (düütsk: Neumarkt in Schlesien), rägeld tou goude Skoul-Uuttuuske fíert, is ap ju Siede fon do, do deer inŚroda Śląska bäte stounde, dät Foarhäben wuden, uk twiske do politiske Meenten een Partnerskup tou grúundjen.
Die Burgermääster un die Meenteräid fon ju Stääd Środa Śląska uurmiddelden ju Meente Seelterlound mäd n Skrieuwen fon dän 8. April 1999 dät „Bod tou een Partnerskup“. Tou ju sälge Tied wuden uk die Burgemäster fon ju Meente Seelterlound tou aan Bisäik ätter Środa Śląska ienleden. Düsse Ienledenge noom ju Meente Seelterlound oun. Fon dän 7. bit 10. Oktober 1999 besoachte een Soandskup mäd dän Burgermääster ju Meente Środa Śląska, uum een eerste Ferbíendenge aptouníemen.
Ätterdät do Räide fon ju Stääd Środa Śląska un ju Meente Seelterlound een Meente-Partnerskup je eenstimmig besleten hieden, unnertekenden Burgermääster Boguslaw Krasucki un Meenteräids-Foarsitter Waldemar Wawrzynski foar ju Stääd Środa Śląska ap ju eene un Burgermääster Hubert Frye foar ju Meente Seelterlound ap ju uur Siede ap dän 1. Juni 2002 ju Partnerskups-Deelskrift.
In ju Partnerskups-Deeltskrift ferkloorje sik bee do Sieden unner juunsiedige Bioachtenge fon do Kultúuren un bie Respektierenge fon do politiske, religiöse un sälskuppelke Ogenmäärke tou een Partnerskup mäd dän Sin, aaltied in Kontakt tou blieuwen un juunsiedig in masse ferskedene Seken in dän kommunoale Biriek Stöän tou reken. Färe wäd die Wille uutspreken, ju Touhope-Oarbaid un ju Partnerskup ätter do Wonske un Múgelkhaide fon do Burgere fon bee do Meenten wieder un japper tou moakjen. Deerbie wäd ju Hoopenge uutdrukt, dät düsse Ferienberenge do Moanskene ap bee do Sieden fon't Skeed fjúundskuppelk touhope brangt un deer truch dät lieuwige Gefäil fon europäisk Touhopeheren groait.
Unner ju Wiele wude Peter Ziegler, Apgjuchter foar fon ju düütsk-poolske Fjúundskup twiske do bee Skoulen fon do bee Partner-Meenten, foar n Eren-Burger fon ju Stääd Środa Śląska binaamd.
Sänt 1999 roate dät morere juunsiedige Bisäike truch Soandskuppe fon do Partner-Meenten, wier uk ferskedene Fereens-Fertredere deelnomen. Mäd dän Sin fon ju Oustämmenge fon do Múgelkhaide fon ju Meeoarbaid un uum do bistoundende Ferbíendengen binne dän Partnerskups-Ferdraag färe uut tou bauen, skällen do Fereens-Foarsittere fon interessíerde Ferene fon bee do Meenten touhope broacht wäide.
Ju Partnermeente Środa Śląska, ju uk as „Krale fon Läich-Slesien“ bitekend wäd, findt sik oun do fon't Wääste ätter't Aaste fon Europa loopende Haud-Ferkíers-Sträiten, sowät 130 km uur dät düütske Skeed. Ju Stääd Środa Śląska lait sowät 32 km wäästelk fon Breslau. In dät 215 km² grote Meente-Rebät lieuwje moor as 19.000 Ienwonere. Uum ju Stääd tou läze 27 Täärpe ferdeeld. Tou do wichtigste Meente-Säntren here: Środa Śląska mäd 9.000 Ienwonere, Szcepanów, Ciechów un Rakoszyce. Ju Bifoulkengstichtegaid is mäd 90 Ljude ap n Quadroatkilometer in't Ferhooldnis groot.
Bie Bau-Oarbaide in ju Midde fon ju Stääd wuden Krounjuwelen fon n Kening fúnen – die Skät fon Środa. Düsse Skätte here tou do baldoarichste uut dät Middeloaler in Polen un Europa.
Al in't äddere Middeloaler, wildäge in't tjaande of alfte Jíerhunnert, wude dät Rebät fon do Slesiere bisiedeld. Eende fon dät 12. Jíerhunnert waas Środa Śląska al as Honnels un Määrked-Siedelenge bikoand. Do eerste Skriftstukke, do ju Siedelenge Środa Śląska floamske Stäädgjuchte toubilligeden, sunt uut dät Jíer 1218. Uum ju bisunnere Loage wude ju Stääd Offer fon masse Rooweräien un Kriege. Ätter een moor as twohunnertjíerige Heerskup fon do Tschechen, broachten do Hussitenkriege ju Stääd tou uurs aan Stoat: Ju Heerskup fon do aastriekiske Haabsbúrgere heert tou do biwägedere Tieden in ju Fergeenhaid fon Stääd un Umelound. Eerste in't 18. Jierhunnert bigint ju prüüske Heerskup. Mäd ju näie politiske Oardenge komen uk Umesleke in Sälskups-, Glowens- un Wirtskups-Líeuwend. Dät Eende fon dän 2. Wareldkrieg bitjudte wier uurs ne stoaltelke Touheregaid un ju Repolonisíerenge fon aal dät Rebät.
