Wät dät tou sjoon rakt
Wäl appe Truchraize truch Seelterlound kumt, toankt sik nit, dät hie hier two Bisunnerhaide foarfíende kon, do dät hiere Ferbíendenge nit foar n twäid Moal rakt: Dän Foan un ju Seelterske Toal.
Ju Uurseke foar ju Biwoarenge fon ju seelterske Toal wäd in ju eerdere Ousletenhaid fon do hier lieuwjende
Moanskene truch do umetouläzende Foane fermouded. Ap dän Loundwai kude me in dät Seelterlound bloot ientringe, wan die Foan wilst n bisunners strommen Winter tichtfäärzen waas.
Seelter Foankieker - Foanfíerde
Foanflakten, do in grote Dele fon dät Meenterebät noch deer sunt, bistimme ju Loundskups-Bíelde. Wäl noch sieläärge nit ap wooke Foan-Grúunde steen häd un ju
Fíerte fon do Foanloundskuppe kannen leerd häd, wol fon een Fíerd mäd dän "Seelter Foankieker“ joop biiendrukt weze. Wäl sik foar Natúur un Loundskup interessiert un aan Glap in ju Brukenge fon do Foane kriege moate, skuul een Fíerd mäd ju Foan-Boan nit
ferpaasje. Hier wäd die Gast ieuwenske dät Groaien fon do Hoge Foane uk masse uur dät Eedgreeuwen un ju Renatúuríerenge wíes. Aan Sunnenunnergoang uur do Woater- un Wuulgäärs-Flakten fon do Renatúuríerengs- Rebätte is een littik Skjonis foar Natúur- Ljoofhäbere buute fon do uuttredene Pade
fon dän Massentourismus.
Paddel- un Pedoal-Statsjoon.
Truch aal fjauer Meente-Dele windt sik ju bíeldeflugge Seelter Äi, ju as Skipfoartswai aleer ju eensige Ferbíendenge tou ju Butewareld waas. Dälig konnen Jie bie ju Paddel- un Pedoal-Statsjoon in Strukelje ju
Seelter Äi mäd dät Kanu bifoare un ju wunnerfroaie, ouwikselengs-rieke Loundskup fon n bisunneren Punkt uut bikiekje.
Hollener See
Ferhoalenge in ju Natúur bjudt uk die Boadesee in Hollen, die juust as die Klokkerkewoold un -see in Skäddel tou't Kaierjen aasket. Die Boadestround oun dän 9,5 Hektoar grote Hollener See is bisunners in do Sumer-Mounde een froai Siel foar ju hele Femielje.
Galerie-Hollounder-Wiendmäälne
Foulget in Skäddel do Kaier-Rundweege, dan kume Jie tou aan bisunneren Skät, ju Skäddeler Määlne.
Ju 1870 baude Galerie-Hollounder-Wiendmäälne wude in 2002 fon Grúunde ap saníerd un foar n Deel uk wier in 2016 ap Stede broacht. Ju is noch fulkemen kloor foar'n Bidrieuw. Dät hele Timmerwíerk is sänt 1870 nit umebaud wuden. Binne in ju Määlne sunt oolde búurske Rewen uutstoald. Tichte bie ju Määlne rakt dät een Museum. Bisäikere konnen ju Määlne, wan dät ouboald is, bisäike. In do Mounde Moai bit September is ju Määlne ap älken eersten un trääden Sundai in't Mound ättermiddeges fon Klok two bit holig säks epend. Fon do Líede fon dän Määlnefereen wäd ap düsse Deege Koafje un sälwenmoakeden Kouke ounbeden. Foar Uutkumste un Termin-Ousproaken stoant Dieter Friedhoff, Piepkebierich 20, Skäddel, Tel.: 04492 91 55 77, tou Ferföigenge. Wäl een bisunner Ambiente foar dän „Búund foar't Líeuwend“ säkt, kon sik in ju Skäddeler määlne hilkje läite, un düt ap Wonsk in Seelterfräiske Toal.
Interessierde Bisäikere fon dät Seelterlound konnen uk dät "Seelter Tjuchnis", aan Seelter Toal-Test foar Touristen, die fon dän Hemat-Fereen „Seelter Búund“ truchfíerd wäd, ouläze. In dän Meente-Deel Romelse moaket ju eerste 1999 ap Stede broachte „Schoofsche Määlne“ ju Täärpsbíelde flugger.
Räidhúus fon ju Meente Seelterlound
Dät in 1992 kloor moakede Räidhúus in Romelse stoant foar Bisäikergruppen un Bikiekengen epen. Termine foar een Fíerenge truch dät Räidhúus sunt mäd Fr. Thoben, Tel.: 04498 940-102, uut tou moakjen.
Johanniter - Kapälle in Boukelisk
Nit bloot, wäl mäd Flitsepee loangs ju Düütske Feen-Sträkke unnerwaiens is, skuul in Strukelje-Boukelisk 
bie ju moor as 600 Jíere oolde Kapälle fon dät eerdere Johanniter-Klaaster een besinnelke Rääst moakje. Deeges is ju unner Toankmoalseekerenge stoundende bääte Boome ferstoppede Kapälle foar Bikiekengen epend. Uk fon ju Kloppenbúrger Flitsepee-Tour, ju uk truch Strukelje fíert, loont sik n Ousteter ätter ju Johanniter-Kapälle. In't Jíer 2010 wude in ju eerdere Pasteräi een Informatsjoons-Säntrum iengjucht, wier do Bisäikere uur ju Fergeenhaid fon dät Klaaster wíes wäide konnen. Dät Informatsjoons-Säntrum kricht uut dät Programm "INTERREG IV a Deutschland-Nederland“ Jäildere.
Museums-Iersenboan Ammerlound-Seelterlound
Bisunners Femieljen un wäl in Gruppen unnerwaiens is, fíert jädden mäd ju Museums-Iersenboan Ammerlound Seelterlound, ju ap Wíekeneenden twiske Wäästerstede un Seelterlound truch ju Loundskup kaiert. Toumäts piepet dät wilst ju Raize baldoarig – dät mout so weze, uumdät sik die Lokfíerder foar älken Boan-Uurgoang „ounmäldje“ mout – oun älke „Molkbumme“ wäd ounheelden; so njut me een Fíerd mäd ju Museums-Iersenboan! Fíeret mee! Ap Wonsk fersúrgje Jou skoulde Gastefíerdersken, wan Jie deer sunt, un wäie Jou in do litje Stilkenhaide fon dät Seelterlound ien. So rakt dät t.B. Bit dälig dät Fertälster fon ju Klokke in dän Skäddeler Krätseldoabe, wildäge skulen Jie ap Skät-Säike gunge?
Wollen Jie noch moor wíes wäide? Wie biräide Jou bie Jou individuelle Raize-Ploanenge jädden of seende Jou ap Aaskenge Prospekt-, Koarten- of Boukmaterioal uur dät Seelterlound un sien Umelound. Seendet uus Jou Ounfräige of fräiget telefonisk ätter unner ju Nummer: 04498 940-115.
Foan- un Feen-Museum
Kräkt bie do „Tjobräge“ in Liesbetfeen, twiske Bäärsel un dät Seelterlound lait dät FOAN- UN FEEN-MUSEUM. In twäin Uutstalengskomere un een Butelounderäi konnen Bisäikere uutfíende, wo do hoge Foane wuden sunt, wo die Moanske ju Loundskup uum Liesbetfeen tou bistimd häd un wät wie dälig oun do hoge Foane häbe. In ju kemoudige TEESTOWE konnen Bisäikere „foantypisk“ Íeten un Drinken fersäike.
