Wier n Uutflucht wai gunge kon:
Museums-Iersenboan Ammerlound-Seelterlound
Ju Museums-Iersenboan Ammerlound-Seelterlound fiert ap Wíekeneenden twiske Wäästerstede un Seelterlound. Ap ju Fíerd kon me een Lokfíerder-Patänt, in ju Skäddeler Määlne dät „Seelter Tjuchnis“ kriege. Ferbíendet düsse Uutflucht daach mäd een Foan-Boan-Fíerd in Romelse.
Dierte-Park Thüle 
(sowät 25 km)
Mäkkelk un gau uur ju B 72 tou roakjen is düsse Stede. Hier lait ju Thülsfelder Doalspere mäd een sowät 170 Hektoar grote Woaterflakte. In ju Holt- un Hede-Loundskup deer umetou rakt dät ounsprekende Múgelkhaide, tou kaierjen. Foar Femieljen-Uutfluchten ideoal is die Dierte- un Fräitiedpark Thüle.
Moor as 500 Dierte sunt ap ju wiedloftige Flakte touhuus. Nit bloot foar Bäidene bjudt hier die Bilieuwnis-Spilploats mäd sien Toalrieke Fíerbidrieuwe un Spiel-Rewen Spoas un Unnerholdenge. Aan Strook-Zoo foar do Litjere un een ounsprekende Restauratsjoon rundje dät Bod ou.
.
Klauer-Woold Noud
Färe findt sik tichte bie ju Thülsfelder Doalspere die Klauerwoold Noud Klauer-Woold Noud. Ap een Flakte fon 3 Hektoar 
sunt hier tachentig ferskedene Klauer-Elemente ienbaud – mäd Nät-Brägen, Brede un Rope gungt dät Stap foar Stap fon Boom tou Boom. Fjauer ferskedene Parcours stounde foar Biginnere un foar goude Klauerdere tou Ferföigenge.
Die Ferbúund Ooldenburger Munsterlound häd moor Informatsjonen, wier me in't Ooldenbúrger Munsterlound Uutfluchten moakje kon.
Bäärsel (sowät 10 km): Mäd dät Foargast-Skip „MS Spitzhörn“ konnen in't Bäärseler Joop Rundfoarten unnernúmen wäide. Uutkumste uur do Foar-Tieden krigt me fon dät Ferhoalengsrebät Bäärsel-Seelterlound unner ju Roup-Nummer 04498 940-115. In Liesbetfeen rakt dät uk dät Foan- un Feen-Museum.
Kloppenbúrig (sowät 45 km): Dät Museums-Täärp in Kloppenburig
is dät ooldste Fräiljoacht-Museum fon Düütsklound. Ap een 15 Hektoar grote Flakte sunt sowät 50 täärpske Bautoankmoale tou bikiekjen. Buppedät wäide ooldwareldske Hondwíerke deerstoald.
Ooldenburig (sowät 45 km): Tou't Ienkoopjen kon me in ju Ooldstääd mäd Düütsklounds ooldste Foutgunger-Zone gunge. Bisunners sjoonswäid sunt hier uk masse Museen un dät Slot mäd dän Slot-Tuun.
Surwold (sowät 40 km): Bisunners foar Femieljen is die grote Bäidens-Spielploats mäd Sumer-Rodel-Boan, Uutkiek-Touden mäd Grote Rutske, Minigolf-Fäild, Määrken-Woold tichtebie un aal sowät een Uutflucht wäid.
Pappenburig (sowät 25 km): Midde in ju idylliske Kenoal-Stääd Pappenbúrig läze Sail-Skiepe. Uk sunt Bikiekengen fon ju Meyer-Hällenge mäd dät Grootste unner Täk läzende Druuch-Dok in ju Wareld múgelk. Iendrukke uur ju Apgjuchtenge fon ju Feen-Kolonie kon me bie ju Velen-Ounläze oun dän Splitting-Kenoal kriege. Dät honnelt sik uum een Fräiljoacht-Museum mäd Foan-Kowen, Pütten, Verlaat-Slüze, Hällenge un Brägen. Uutkumste rakt dät unner: 04961 82221.
Sugel (sowät 60 km): Hier is dät barocke Slot Clemenswerth tou bikiekjen. Dät Joagd-Slot stoant, fon oachte Pavillon-Bauwíerke uumroat ap n oachte-stroaligen Allee-Stiern.
Twiskenoan (sowät 30 km): Ap't sudelke Ouger fon't Twiskenoaner Meer lait ju Kuurstääd Twiskenoan, ju uk stoatelk oachted Foan-Heelboad is. Kräkt bie dän See lait dät Kuur-Säntrum. Deer findt sik uk n Fräiljoacht-Museum un n Boots-Ounläzer foar Uutfluchts-Foarten.
Gräinen (Groningen, sowät 100 km): Ju niederloundske Stääd Gräinen bjudt masse tou bikiekjen, bisunners die Määrked häd wät.
Uk dät aastfräiske Binnelound un ju Noudsee-Kuste mäd do Ailound-Uurfoarten sunt fon't Seelterlound uut gau tou roakjen un loonje sik foar Deges-Uutfluchten.