Seelterske Toal
"Seelterlound“ – so ludt die Nome fon dät Seelterlound in sien ooldfräiske Toal. Een regionoale Bisunnerhaid, nämelk een mäd platdüütske Elemente truchsätte Varität fon ju Fräiske Toal.
Truch ju natürelke Ousletenhaid fon do aleer bienaist uuntruchtringelke Foane, do sik insen uum dät hele Seelterlound tou sloten, häd dät Seelterske in't Middeloaler ríezen un sik bit dälig heelden. Fon ju Ousletenhaid fon dät Seelterlound is deerjuun niks moor tou fäilen. Al loange häd dät näimoudske Tiedoaler do Täärpe feruurd un bistimd. Ju Natürelkhaid, ju uk ju umetou läzende Loundskup uutmoaket, kude daach in do Täärpe heelden wäide. Do Waiwiesere fon do fjauer Meente-Dele Sedelsbíerig, Skäddel, Romelse un Strukelje häbe ieuwenske do düütske uk do Seelterske Nomen mee aape un wieze somäd al ap ju Bisunnerhaid wai.
As „Litst Toal-Ailound fon Europa“ waas dät Seelterlound 1991 in't Guinness-Bouk fon do Rekorde fertreden. Ätter een Unnersäikenge uut dät Jíer 2000 wäd düsse Toal bloot noch fon 2.250 Ljude in Seelterlound boald.
Al sänt fúul Jíere rakt sik die Hemat-Fereen "Seelter Búund“ Moite uum ju Biwoarenge un ju Plege fon ju Toal. In aal do Meente- Dele brange fräiwillige Hälpere un Hälpersken do Bäidene in do Bäidenstuune un Litje Skoulen al ju Seelterske Toal naier. Juustso rakt dät uk Kurse foar uutwoaksene Ljude, do Interesse oun ju Toal häbe.
Sänt August 2010 reke sik wäkke Seelterfräizen Moaite, ju Seelter Toal wier tou Lieuwend tou brangen un tou biwoarjen, mäd amtelken un finanziellen Stöän in dät Modellprojekt "Dät Seelterlound as Modellregion foar äddere Moortoaligaid“, een Touhopeoarbaid mäd dät Lound Läichsaksen, ju Aastfräiske un ju Ooldenbúrigske Loundskup.
Sin is dät Koastere un Jüffere uuttoubíldjen, do in ju Seelterske Toal fiks tou moakjen, didaktisk tou skouljen un Materioal häär tou stalen foar dän Skoul-un Bäidenstuun- Unnergjucht. Sowät 60.000 Euro – ferdeeld ap fjauer Jíere, kosteden
Färebíeldengen un bietoukemene Koaster- Uren. Lound, Meente, Loundskup, Seelter Búund un lokoale Firmen roaten dät Toal- Projekt bit nu Stöän, finanziell un ideell.
Rund uum ju Seelterfräiske Toal sunt al morere Bouke uutbroacht wuden. Ieuwenske dät Näie Testament rakt dät uk litje Läiderbouke un Bouke mäd Fertälstere un Riemsele ap Seeltersk. Wäl sik foar düsse Bouke interessiert, kon him bie ju Meente Seelterlound koopje.
